Tolosako Gazte Topaguneak antolatuta, urtero bezala, aurten ere auzolandegiak egingo dira 11 eta 17 urte bitarteko gazteekin ekaina eta uztaila bitartean.
Zehazki bi txanda egongo dira: ekainaren 26tik 30era izango da lehen txanda eta uztailaren 3tik 7ra bigarrena. Goizez eramango dira aurrera, 9:30etik 13:30era eta parte-hartzaileek, besteak beste, miserikordia zaharreko landare igokariak eta belar txarrak kendu eta moztuko dituzte. Helburua da ingurumenaren zaintza sustatzea gazteen artean, kontzientziazio eta sentsibilizazio ariketa gisa.
Izen ematea dagoeneko zabalik dago eta interesdunek udal webgunearen bitartez edo aurrez-aurre, UDATEn eman ahal izango dute izena apirilaren 30a arte. Behin bi txandak amaituta, parte-hartzaile guztiak Sendavivara joango dira egun pasa, egindako lanaren eskertza gisa.