Lanbide Euskal Enplegu Zerbitzu Publikoaren eta Europar Batasunaren dirulaguntza jaso du Udalak kontratazioak egiteko, azken honek kofinantziatutako EAEko EGF Plus 2021-2027 Programaren barruan.

Lanaldi osoko kontratuak izango dira guztiak, urtebeteko eperako. Lanean hasteko aurreikusitako data azaroa da. Hauek dira eskainiko diren lanpostuak:

• Kultura eta Gazteriako erdi-mailako teknikaria
   Kultura eta Gazteria arloetako egitasmoei lotuta, parte hartze-, kudeaketa- eta dinamizazio- lanak egingo ditu.
  Titulazioa: Humanitateak, Gizarte Zientziak eta Komunikazio gradua, edo baliokidea

• Euskarako administraria
   Euskara eta Hezkuntza Saileko jarduerak eta materiala eguneratu, espedienteak izapidetzearen ondoriozko administrazio-lanak egin, dirulaguntzak kudeatu, eta saileko lanak planifikatu eta antolatu beharko ditu.
  Titulazioa: Administrazio finantzen goi-mailako titulua, edo baliokidea

• Garapen Ekonomikoko erdi-mailako dinamizatzailea
   Tolosako merkataritza, ostalaritza, eta zerbitzu-enpresen datu-basea sortzea, tokiko merkataritza sustatzeko ekimenak garatzea, eta asteroko azokei lotutako lanak kudeatzea izango dira bere egitekoak.
  Titulazioa: Enpresen administrazio, Turismo edo merkataritza gradua, edo baliokidea

• Ingurumen eta Landa Eremuko teknikaria
   Tolosako bide publikoen inbentarioa eta kudeaketa, landa-eremuko bideetako soiltze-lanen koordinazioa, nekazaritzari lotutako proiektuen garapena eta landa-eremuko auzoei bideratutako dirulaguntzen kudeaketa egin beharko du.
  Titulazioa: Ingurumen-zientzietako gradua, Nekazaritza Elikagaien eta Landa Ingurunearen Ingeniaritzako gradua, edo baliokidea

• Udal-eraikinen mantentze-lanetarako teknikaria
   Eginkizunak izango dira udal-eraikinen arduradunak eta etxebizitza-zerbitzuak kudeatzen dituen eraikin, pisu eta garajeen mantentze-lanak egitea. B gidabaimena eta konponketak modu autonomoan egiteko gaitasuna izatea eskatzen da.
  Titulazioa: Goi-mailako heziketa-zikloko ikasketak edo batxillergoa.

• Udal-eraikinen mantentze-lanetarako teknikari laguntzailea
   Udal-eraikinen arduradunak eta etxebizitza-zerbitzuak kudeatzen dituen eraikin, pisu eta garajeen mantentze-lanak egiten laguntzea izango da bere egitekoa.
  Titulazioa: Oinarrizko heziketa zikloa ikasketak, edo DBH.

Bete beharreko baldintzak

Lanpostuetarako eskaera egin ahal izateko, hauek dira bete beharreko baldintzak:

• 16 urte baino gehiago eta 30 baino gutxiago izatea.

• Euskarazko C1 maila (salbuespenak: B2 maila mantentze-lanetako teknikariarentzat, eta B1 maila mantentze-lanetako teknikariaren laguntzailearentzat)

• Lanbide, Euskal Enplegu Zerbitzuan enplegu-eskatzaile izatea, alta egoeran, eta bete behar den lanpostuari dagokion hezkuntza-maila izatea.

• Gazte Bermerako Sistemaren Fitxategian inskribatuta egotea.

• Praktiketako lan-kontraturako baldintzak betetzea.

Baloratuko da Tolosakoa edo Tolosaldekoa izatea.

Eskaera nola egin

Interesdunek eta baldintzak betetzen dituztenek, Lanbide, Euskal Enplegu Zerbitzuaren webgunearen bitartez izapidetu beharko dute eskaera: www.lanbide.euskadi.eus.