Ehungintzaren sektorea hirugarrena da munduan ur kontsumoan eta lurzoruen erabileran; eta bosgarrena lehengaien erabileran eta berotegi-efektuko gasen igorpenean. 7.500 litro ur behar dira bakero batzuk ekoizteko. Jantzien sektoreak 93.000 milioi metro kubiko ur erabiltzen du urtero, 5 milioi pertsona bizirik irauteko adina. Modaren industria da uraren guztizko galeraren %20aren erantzulea mundu mailan. Arropa eta oinetakoen ekoizpenak berotegi-efektuko gasen %8 eragiten du. Segundo bakoitzean, zabor kamioi bat betetzeko adina ehun kopurua lurperatzen edo erretzen da... ehungintzaren ekoizpenean eta kudeaketan neurriak hartu ezean, aurre egin beharreko erronken dimentsioaren ikuspegia ematen digute datu horiek.

2025eko urtarrilaren 1ean sartu zen indarrean Europar Batasuneko araudi berria. 2018ko zuzentarau berri horrek ehun hondakinen gaikako bilketara behartzen ditu estatukideak, bai eta hondakin horiek berrerabiltzeko eta birziklatzeko helburu batzuk ezartzera ere. Saldu gabeko ehun soberakinak suntsitzea ere debekatuta dago. Legeak Ekoizlearen Erantzukizun Hedatua (EEH) jasotzen du, enpresek beren produktuekiko dituzten betebeharrak handitzen dituen kontzeptua. Fabrikatzaileak sortzen dituzten produktuak berreskuratzeko prozesuan inplikatzea bilatzen du, eta merkatuan jartzen dituzten produktuen gainean duten erantzukizuna helaraztea. Neurri horiek, ekodiseinuarekin zerikusia duten beste neurri batzuekin batera, kontsumo osteko ehungintzaren bilketaren, tratamenduaren eta merkaturatzearen sektorea iraultzen ari dira.

Eta hori guztia laneratzeko enpresen funtsezko eginkizunarekin, horiek baitira une honetan ehun hondakinak biltzeko, tratatzeko eta berrerabiltzeko/birziklatzeko jardueran dihardutenak. 7/2022 Legearen 19. xedapen gehigarriak, Estatuan eta Europar Batasunean modu aitzindarian, laneratzeko enpresei bideratutako kontratazioa ezarri du ehun hondakinak, altzariak eta tresnak biltzeko eta tratatzeko; kontratu publikoen %50ekoa, hain zuzen ere. Laneratzeko enpresak interes ekonomiko orokorreko zerbitzuak ematen dituzten erakundeak dira (Gizarte Ekonomiari buruzko martxoaren 29ko 5/2011 Legearen 5.4 artikulua), Europar Batasunaren Funtzionamenduari buruzko Tratatuaren 106. artikuluan jasotako lehia askearen eta merkatu askearen printzipioen salbuespen.

Espainian, laneratze enpresok bereizita biltzen den ehun hondakinaren erdia baino gehiago biltzen dute. Horrela, bazterkeria egoeran edo arriskuan dauden pertsonei laguntzea eta laneratzea lortzen da, iraunkortasunean ez ezik, gizarte ekonomian ere aurrera egiten lagunduz.

Uda Ikastaro honetan, prozesuaren balio kateko eragile garrantzitsuek hartuko dute parte, aurrean ditugun erronkak partekatzeko eta egungo kontsumo ereduak eragindako kutsadurari aurre egiteko lan publiko-pribatu koordinatu baten beharra zabaltzeko.